پیٹرولیم مصنوعات کی قیمتوں میں کمی کا اطلاق آج رات 12 بجے سے ہو گا
وزیراعظم شہبازشریف نے ڈیزل 135 روپے اور پیٹرول 12 روپے فی لیٹر سستا کرنے کا اعلان کر دیاہے جس کے بعد ڈیزل کی نئی قیمت 520 روپے سے کم ہو کر 385 روپے جبکہ پیٹرول کی قیمت 378 روپے سے کم ہو کر 366 روپے ہو جائے گی ، نئی قیمتوں کا اطلاق آ ج رات 12 بجے سے ہوگا۔
وزیراعظم شہبازشریف نے قوم سے خطاب کرتے ہوئے کہا کہ ایسے موقع پر جب اللہ کے کرم سے خلیج میں اب جنگ نہیں بلکہ امن کی باتیں ہو رہی ہیں وہ فریقین جو کل تک جنگ میں آمنے سامنے تھے ، خطہ تباہی کا منظر تھا، آج الحمداللہ دونوں فریقین بات چیت کے ذریعے معاملات کو طے کرنے پر راضی ہو چکے ہیں، میں اس انتہائی اہم پیشرفت پر اپنے برادر ملک ایران اور امریکہ کی لیڈرشپ کا تہہ دل سے شکریہ ادا کرتاہوں ، جنہوں نے میری تجویز قبول کرتے ہوئے نہ صرف عارضی جنگ بندی پر اتفاق کیا بلکہ میری پرُخلوص دعوت پر دونوں ممالک کی لیڈرشپ اسلام آباد تشریف لارہی ہیں جہاں پر امن کے قیام کیلئے مذاکرات ہوں گے، پاکستان کو اللہ تعالیٰ نے میزبانی کا جو شرف دیا ہے یہ صرف پاکستان کیلئے نہیں بلکہ عالم اسلام کیلئے لمحہ فخریہ ہے جس کیلئے ہم اللہ کا شکر ادا کرتے ہیں ۔
انہوں نے کہا کہ ان نازک ترین لمحات میں پاکستان کی لیڈرشپ نے انتہائی محتاط انداز میں مگر بڑے اعتماد کیساتھ دونوں فریقین کو عارضی جنگ بندی پر نہ صرف راضی کیا بلکہ اسلام آباد آنے کیلئے پرُخلوص دعوت دی اس کیلئے میں اسحاق ڈار اور ان کی ٹیم کو دن رات محنت پر خراج تحسین پیش کرتاہوں، خاص طور پر فیلڈ مارشل عاصم منیر اور ان کی ٹیم کو دل کی گہرائیوں سے خراج تحسین پیش کرتاہوں جنہوں نے انتھک محنت سے جنگ کے شعلے بجھانے اور فریقین کو مذاکرات پر راضی کرنے کیلئے ایک کلیدی اور تاریخ ساز کردار ادا کیا، اس حوالے سے فیلڈ مارشل کی ان خدمات کو تاریخ ہمیشہ سنہرے الفاظ میں یاد رکھے گی۔
شہبازشریف کا کہناتھا کہ عارضی جنگ بندی کا اعلان ہو چکا ، مگر اب اس سے بھی زیادہ کٹھن مرحلہ دیر پا جنگ بندی کا ہے، وہ مذاکرات کے ذریعے الجھے ہوئے مسائل کو حل کرنے کا مرحلہ ہے ، میں آپ سب سے درخواست کروں گا کہ آپ اللہ تعالیٰ سے دعا کریں کہ اللہ تعالیٰ ان مذاکرات کو اپنی مہربانی سے کامیاب فرمائے اور اس طرح ان گنت معصوم زندگیاں بچ جائیں گی اور دنیا میں امن قائم ہو جائے گا۔ اس کیلئے کل دونوں ممالک کی لیڈرشپ اسلام آباد انشاء اللہ موجود ہوگی ، پاکستانی قیادت ان مذاکرات کو کامیاب کرانے کیلئے اپنی پوری کوشش کرے گی ، باقی نتائج اللہ کے ہاتھ میں ہیں۔
وزیراعظم نے کہا کہ جب سے یہ قیامت خیز مہنگائی کا طوفان آیاہے ، میں نے آپ سے یہ وعدہ کیا تھا کہ جونہی عالمی منڈی میں تیل کی قیمتیں گریں گی میں انشاء اللہ وہ فائدہ فی الفور آپ تک پہنچاوں گا۔ آج عالمی منڈی میں تیل کی قیمتوں میں کچھ کمی ہوئی ہے اور مجھے یہ مشور ہ دیا گیا کہ پچھلے چند ہفتوں میں آپ تک اس قیامت خیز مہنگائی کو روکنے کیلئے جو حکومت پاکستان نے اپنے وسائل سے 129 ارب روپے خرچ کیئے تھے ان اخراجات کو کم کرنے کیلئے اب جو تیل کی قیمتوں میں کمی ہوئی ہے اس کا کچھ حصہ عوام کو پہنچایا جائے اور کچھ حصہ روک کر 129 ارب روپے کےاخراجات میں کمی لانے کیلئے استعمال کیا جائے۔
وزیراعظم نے کہا کہ جب سے یہ قیامت خیز مہنگائی کا طوفان آیاہے ، میں نے آپ سے یہ وعدہ کیا تھا کہ جونہی عالمی منڈی میں تیل کی قیمتیں گریں گی میں انشاء اللہ وہ فائدہ فی الفور آپ تک پہنچاوں گا۔ آج عالمی منڈی میں تیل کی قیمتوں میں کچھ کمی ہوئی ہے اور مجھے یہ مشور ہ دیا گیا کہ پچھلے چند ہفتوں میں آپ تک اس قیامت خیز مہنگائی کو روکنے کیلئے جو حکومت پاکستان نے اپنے وسائل سے 129 ارب روپے خرچ کیئے تھے ان اخراجات کو کم کرنے کیلئے اب جو تیل کی قیمتوں میں کمی ہوئی ہے اس کا کچھ حصہ عوام کو پہنچایا جائے اور کچھ حصہ روک کر 129 ارب روپے کےاخراجات میں کمی لانے کیلئے استعمال کیا جائے لیکن میں نے ایک لمحے کی تاخیر کے بغیر یہ تجویز مسترد کر دی ۔اس لیئے کہ جب قیمتیں آسمان سے باتیں کر رہی تھیں اور مہنگائی کا بوجھ آن پڑا ، میں نے اس بات کا خود مشاہدہ کیا آپ نے کتنے صبر اور تحمل سے وہ مہنگائی کا بوجھ برداشت کیا، آج جب قیمتوں میں کچھ کمی ہوئی ہے تو میں اس کو اپنی اخلاقی سیاسی ذمہ داری سمجھتاہوں کہ اس کمی کا ایک ایک روپیہ آپ کے قدموں میں نچھاور کیا جائے ۔
شہبازشریف نے قوم سے خطاب میں کہا کہ اس کے علاوہ آج کے اعلان کے حوالے سے جہاں تیل کی قیمت میں کمی ہوئی وہیں حکومت نے دیگر ذرائع سے کچھ وسائل جمع کرکے اور مالیاتی نظم و ضبط کے ذریعے اس میں اپنا بھرپور حصہ ڈالا ہے کیونکہ گندم کی کٹائی شروع ہو چکی ہے، اس مرحلے پر اپنے محنتی کسان کیلئے لاگت کم کرنا انتہائی ضروری ہے ، اگر یہ نہ ہوا تو کسان کی محنت ضائع ہو جائے گی بلکہ عام شہری کے گھر میں کھانے پینے کی اشیاء بھی مہنگی ہو جائیں گی، لہذا ڈیزل کی قیمت میں فی الفور 135 فی لیٹر کمی کا اعلان کرتاہوں ، ڈیزل کی قیمت 520 روپے فی لیٹر ہے وہ آج رات 12 بجے کم ہو کر 385 روپے فی لیٹر ہو جائے گی جس سے نہ صرف ذرعی شعبے میں آسانی ہو گی وہاں پر عام آدمی کیلئے پبلک ٹرانسپورت کے اخراجات میں بھی کمی آئے گی، اسی طریقے سے پیٹرول کی قیمت میں پچھلے ہفتے 80 روپے فی لیٹر کمی کا اعلان کیا تھا اس میں آج مزید 12 روپے کمی کا اعلان کر رہاہوں اور اس طرح پیٹرول کی قیمت 378 سے کم ہو کر 366 روپے فی لیٹر ہو جائے گی ۔
