پیٹرولیم ڈویژن نے اوگرا کے مقرر کردہ قیمتوں کا نوٹیفکیشن جاری کردیا
حکومت نے پیٹرولیم مصنوعات کی قیمتوں میں معمولی کمی کردی اور پیٹرولیم ڈویژن نے نوٹیفکیشن بھی جاری کردیا۔
پیٹرولیم ڈویژن کی جانب سے جاری نوٹیفکیشن میں بتایا گیا کہ آئل اینڈ گیس ریگیولیٹری اتھارٹی (اوگرا) نے وفاقی حکومت کی جانب سے جاری میکنزم کی بنیاد پر پیٹرولیم مصنوعات کی قیمتوں میں ردوبدل کردیا ہے۔
نوٹیفکیشن کے مطابق حکومت نے ہائی اسپیڈ ڈیزل کی فی لیٹر قیمت میں صرف 19 پیسے اور پیٹرول کی قیمت میں 50 پیسے کی معمولی کمی کر دی ہے۔
قیمتوں میں ردوبدل کے بعد پیٹرول کی فی لیٹر نئی قیمت 342 روپے 60 پیسے اور ہائی اسپیڈ ڈیزل کی نئی قیمت فی لیٹر 371 روپے 61 پیسے مقرر کی گئی ہے۔
