کراچی : اسرائیل امریکا کےایران پر حملے کے بعد پاکستان اسٹاک مارکیٹ کریش کر گئی، انڈیکس 15 ہزار پوائنٹس گر گیا، جس کے بعد ٹریڈنگ معطل کردی گئی۔
مشرق وسطیٰ میں ایران پر امریکہ اور اسرائیل کے حملوں کے بعد پیدا ہونے والی شدید کشیدگی نے پاکستان اسٹاک مارکیٹ میں تاریخی مندی ریکارڈ کی گئی۔
پیر کے روز کاروبار کے آغاز پر ہی مارکیٹ شدید مندی کا شکار ہوئی، جس کے نتیجے میں کے ایس ای 100 انڈیکس میں تاریخ کی بدترین گراوٹ دیکھی گئی۔
مارکیٹ کھلتے ہی فروخت کا شدید دباؤ دیکھا گیا اور انڈیکس 15,121 پوائنٹس کی بڑی کمی کے بعد 1 لاکھ 52 ہزار 940 کی سطح پر آگیا۔
انڈیکس میں 9 فیصد سے زائد کی کمی اور ‘مارکیٹ ہالٹ’ (Market Halt) کی سطح عبور ہونے کے باعث پی ایس ایکس انتظامیہ نے فوری طور پر ٹریڈنگ روک دی۔
بعد ازاں ٹریڈنگ کے آغاز کے بعد 100 انڈیکس 16089 پوائنٹس کی کمی کے بعد ایک لاکھ 51 ہزار774 پوائنٹس پر بند ہوا، اس دوران اسٹاک مارکیٹ 9.29 فیصد گرگئی۔
اسرائیل اور امریکہ کے ایران پر حملوں کے باعث عالمی سطح پر تیل کی قیمتوں میں اضافے اور ممکنہ علاقائی جنگ کے خدشات نے مقامی سرمایہ کاروں کو ‘پینک سیلنگ’ (Panic Selling) پر مجبور کر دیا۔
معاشی ماہرین کا کہنا ہے کہ اسٹاک مارکیٹ میں اس غیر معمولی مندی کی بنیادی وجہ جیو پولیٹیکل حالات ہیں۔
